Өскемендегі пульмонологиялық орталық дайын болып қалды

150 төсек-орындық пульмонологиялық орталық бұрынғы ЖМКА ғимаратында ашылады. 
 
Оны қайта құрылымдау жұмыстары екі ай бұрын басталған. Осы уақыт ішінде ғимараттың іші түгелдей жөнделіп, сыртқы қасбеті қалыпқа келтірілген. 

- Қазіргі уақытта жұмыстардың 80 пайызы жасалды, - дейді ШҚО әкімі Даниал Ахметов. - 200 адам жөндеу жұмыстарын жүргізіп жатыр. Медициналық құрылғылар мен жиһаздар орындарына қойыла бастаған. Әр палатада оттегі розеткасы болатынын атап өткен жөн. Орталықта пульмонологтармен қатар, инфекционистер де жұмыс жасайтын болады. 35 төсек-орындық жансақтау және интенсивті терапия бөлімдері болады.

Өңір басшысы КВИ жұқтырғандар саны күрт артатын болса, 6 мың төсек-орын дайын тұрғанын да атап өтті. Қосымша бес ПТР-зертхана мен үш КТ кабинеттері ашылады.

Одан өзге, COVID-19  жұқтырған жағдайы ауыр науқастар үшін иммундық плазма дайындалуда.