Өскемен елорданың туған күні мен Домбыра күнін атап өтеді

Облыс орталығында 6 шілде күні сағат 12.00-де Достық үйі - Қоғамдық келісім орталығының этномәдени бірлестік ұжымдары шығармашылық концерт қояды.

Ал 18.00-де "Арзан" СҮ-нің автотұрағында - дрэг-рейсингтен қалалық ашық чемпионат, ал Комендантка өзенінің аллеясында концерт, қолөнершілердің көрмесі, жәрмеңке өтеді. Дәл осы уақытта және дәл сондай бағдарлама Республика алаңындағы әуезді субұрқақ жанында да айрықша іс-шаралар легі болады.

Ал Ұлттық Домбыра күні, яғни, 7 шілдеде облыс орталығында тек екі іс-шара ұйымдастырылды. Сағат 11.00-де "Император" сауда кешенінің алаңында викториналық ойындар өтсе, ойыннан кейін белгілі музыкант, домбыра аспабының майталманы, Co-Music музыка мектебінің директоры Арлан Серікұлы өзінің өнерін дүйім жұртқа паш етеді. Ұйымдастырушылардың айтуынша, әртіс өз тәжірибесімен бөлісіп, жиналған халық үшін шеберлік сабағын өткізеді.

Ал 18.00-де Өскемен тұрғындарын Республика алаңында ерекше бағдарлама күтеді. Мұнда мерекелік концерт, кітап көрмесі және қолөнер көрмесі жоспарланған. Сондай-ақ, тақырыптық баннер және "Домбыра тарихы" фотоаймағы қойылады. Сонымен қатар, спорттық және балалар ойын алаңдары да қарастырылған. Келіңіздер! Мерекеден қапы қалмаңыздар!