Өскемен мен ШҚО ШҚО туризмін жарнамалау үшін бірнеше миллион қажет
Анықтамалық-ақпараттық буклеттер, карталар мен шағын метражды видеороликтер жасау үшін қаржы жұмсалмақ
ШҚО Туризм және ішкі байланыстар басқармасының басшысы Марат Қабақовтың айтуынша, өңірдің әсем табиғатына отандық және шетелдік туристтердің назарын аудару үшін жарнама жұмысын белсенді жүргізу қажет.
- Шығыстың туристтік орындарына адамдарды тарту – басты мәселе. Былтыр Голливуд жұлдыздарын шақыру арқылы инфотур ұйымдастырған болатынбыз. Биыл 145 миллион қолдаушысы бар қытай блогерлерін елге шақырып отырмыз, - дейді басқарма басшысы.
Былтыр шығысқа келген шетелдіктердің саны 25%-ға дейін өскен көрінеді. Барлығы 29 мыңға жуық шетелдік келген.
- Ең алдымен, ішкі нарықты өзімізге тартуымыз керек. Өңірдің туристтік жерлеріне келетіндердің көбі, яғни, 90%-ы – қазақстандықтар. Ал өңірдің туризмін дамыту мен таныту үшін Алакөл, Рахман бұлағы, Катонқарағай ауданы жайлы бейнероликтер түсіруге 1,3 млн теңге жұмсау жоспарланып отыр, - дейді Марат Саятұлы.