Өскемен мен ШҚО Мектептерде жаңа пән оқытылады
Шығыс Қазақстан мектептерінде күзден бастап жаңа пән оқытыла бастамақ. Пәннің атауы - "Кәсіпкерлік негіздері және бизнес"
Облыстық білім басқармасының деректеріне сүйенсек, бұл пәнді тек 10-сынып оқушылары ғана оқиды, яғни, бір жыл ғана беріледі.
- Пәнді оқытудың мақсаты - кәсіпкерлік, бизнес және экономиканың негіздері бойынша оқушыларға базалық білім беру, баланың кәсіпкерлік ойлау жүйесін қалыптастыру, - дейді Білім басқармасының басшысы Сайрангүл Жұмаділова.
Балаларды кәсіп ашуға үйрететін мұндай пәнді оқушыларға да оқыту керектігін "Атамекен" кәсіпкерлер палатасы ұсынып отырған көрінеді әрі бұл - міндетті пән емес, таңдаулы пән.
- Пән мемлекеттік жалпы білім беру үлгісіне енгізілген әрі 10-сынып оқушыларының кез келгені аталмыш пәнді таңдап, дәріс ала алады. Бағдарламаға сай, аптасына екі рет оқытылады, барлығы - 68 сағат, - деп хабарлайды кәсіпкерлік палатасы.
Мамандардың айтуынша, ел азаматтарының қаржылық сауаты төмен, соның кесірінен пирамида, желілік бизнес сынды көлеңкелі ұйымдардың құрбанына айналуда. Ал мұның алдын алудың жолы - жастайынан кәсіпкерліктің не екенін үйрету.
Қазіргі уақытта Білім министрлігі Ы. Алтынсарин атындағы Ұлттық білім академиясымен бірге пәнді жүргізу жоспарын дайындап жатыр. Пәнді қай мұғалім жүргізетіндігі кейін белгілі болмақ.
