Өскеменде кене "шабуылы" басталды

Биылғы көктем жылы болғандықтан кене де шыға бастады. Облыста алғашқы кене шағу жағдайы биыл наурыз айында тіркелген болатын.

- Қала сыртына шыққан уақытта, саяжай аумағында жүргенде абай болу қажет, - деп ескертеді Өскемен қалалық қоғамдық денсаулықты сақтау басқармасының мамандары. - Сонымен қатар, кене үйге үй жануарларымен, гүл шоқтарымен және киіммен кіруі мүмкін.

Кене шаққан уақытта жүгінуге болатын тәулік бойы жұмыс істейтін орындардың мекенжайы:

Ересектер үшін – Облыстық мамандандырылған медициналық орталық, Абай даңғ., 18,

Балалар үшін – Ана мен бала орталығы, Өтепов көш., 37.

- Егер денеңізге жабысқан кенені өзіңіз алып тастаған болсаңыз, кененің энцефалит жұқтырған-жұқтырмағанын анықтау үшін зертханаға беруге болады, - дейді мамандар.

Зерттеу жұмыстары Сараптама орталығында жасалады. Кенені күнделікті 9.00-ден 17.00-ге дейін Нұрсұлтан Назарбаев көш., 17 мекенжайы бойынша орналасқан аса қауіпті инфекция зертханасының қабылдау бөлімінде қабылдайды. Демалыс және мереке күндері 8-705-752-79-67 нөміріне хабарласуға болады.

Одан өзге, жақын күндері мамандар кене адамдарға шабуыл жасау қаупі жоғары орындарда арнайы тазарту жұмыстарын жүргізеді.

Жұмыстар Ахмер, Аблакетка, Үлбі, Күленов кенті, Орман шаруашылығы, Красин, Согра, ГЭС аумағында, Самсонов, Ушанов, Меновное ауылдары мен Масьяновск ауылы мен Понтон көпірі аумағында жүргізіледі.