Қазақстан Қазақстанда зауыт жанынан алғашқы оқу-жаттығу полигоны ашылды
Павлодардағы алюминий зауытында биіктіктегі жұмыстарды қауіпсіз орындау біліктілігін үйрету үшін оқу-жаттығу полигоны жасақталды
Жаттығуға арналған үлгілер өндірістік оқыс жағдайларға лайықты жасалған. Жаттығуда жұмысшылардың күн сайынғы биіктіктегі жұмысының барлық түрлері, сонымен қатар құтқару-көшіру іс-шаралары көрсетілген, деп жазды egemen.kz сайты.
Кәсіпорынның баспасөз қызметінің хабарына қарағанда, алғашқы күні 60 адам жаңа полигонды іс жүзінде байқап көрді. Жедел курсты олар үшін кәсіби тренерлер өткізген. Тәжірибелік сабақта нұсқаушылар биіктіктегі қауіпсіз орын ауыстыру, тік және көлденең сызықтарды, құдыққа түсуге және биіктіктен төменге түсуге арналған үштағанды пайдалану жолдарын көрсетті.
Сондай-ақ мамандар биіктікте жұмыс істейтін жұмысшыларға арналған құтқару-көшіру құралдарымен таныстырды.
- Бұл кәсіпорынның кез келген биіктік жағдайында жұмыс жүргізуге мүмкіндік береді. Нысан өндіріс қауіпсіздігін арттыру жүйесіне аса қажет, - дейді зауыттың жеке қорғану құралдары жөніндегі менеджері Игорь Кнестяпин.