Өскемен мен ШҚО Суға батып кете жаздаған
Алғабас ауылына жақын маңдағы Тораңғы көлі үстіндегі мұз үстінде көлікпен жүрген балықшы мұз астына түсіп кеткен
- Көліктің алдыңғы есігі бұғаталып, 65 жастағы азамат көліктің артқы есігінен шығуға мәжбүр болған, - деп хабарлайды ШҚО ТЖД баспасөз қызметі. - Балықшы құдіреттің күшімен тірі қалса, көлігі су түбіне кеткен. Азамат 101 арнасына хабарласып, көмек шақыртқан.
Құтқарушылардың сөзіне сүйенсек, олар балықшыны көлге жақын жол үстінен тапқан. Үсті-басы малмандай су, әбден тоңып қалған көрінеді. Алайда дәрігерлердің көмегінен бас тартқан. Құтқарушылар оны жылынғаннан кейін үйіне жеткізіп тастаған.
ШҚО ТЖД көктемгі жылымықтың салдарынан облыстағы су қоймаларындағы мұз жұқарып кеткен. Бұл төтенше жағдайларға себеп болуы мүмкін. Қыста балық аулауға құмар жандарға құтқарушылар абай болуды ескертеді.