Өскемен мен ШҚО Өскеменнің шет аудандарының тұрғындары қалаға жете алмай отыр
Үлбі ауданының тұрғындары жұмысқа жете алмай әуре болуда
Өйткені аялдамаға келген автобустың іші адамға шық толы, кіретін есік жоқ. Ауданға келетін №33, №26 автобус маршруттары мен №250 микроавтобустар аялдамаға тоқтамай кетеді.
- Жұмысқа жету кәдімгідей бас ауруымыз болып кетті. Автобустар соңғы аялдамада тұрған адамдардың барлығын жинап алады да, іші толып кеткендіктен, кей аялдамаларға тоқтамай өтіп кетеді, - деп жазады Үлбі ауданының тұрғыны әлеуметтік желіде.
Өскемен қаласының Жолаушыларды тасымалдау орталығы бұл мәселені шешеміз деп отыр.
- Бұл жағдай бізге таныс. Шешудің бірнеше жолы бар. Шағын автобустардың орнына 80 адам сыятын ірі автобустарды жіберуге болады немесе №26 маршруттың автобустарын көбейту керек, - дейді орталық директоры Ернар Мұстафин.
Директордың сөзіне қарағанда, тұрғындар жұмысқа қатынаған немесе қайтқан кезде ғана автобустың іші лық толып қалады. Ал қалған уақытында іші бос жүреді.
