Өскемен мен ШҚО ШҚО-да сатып алынған медициналық жабдықтар бос жатыр
Шығыс Қазақстанда сатып алынған медициналық құрал-жабдықтардың көбі қолданылмай текке тұр. Өйткені оны пайдалана алатын мамандар аз
Облыста медициналық жабдықтарды сатып алу үшін екі жылда қыруар қаржы жұмсалды. Алайда олардың көбі қаңтарылып бос тұр. Мәселен, Шығыс Қазақстан облыстық ауруханада үш ангиограф бар. Бұл көпқырлы аппараттың қуаты толық қолданылмай жатқаны қынжылтады.
- Астанадағы Ұлттық ғылыми кардиография орталығында барғаным бар. Сонда байқағаным орталық мамандары бес ангиографты күндіз-түні пайдаланады екен. Ол орталыққа елдің түкпір-түкпірінен келеді. Ал бізде үш ангиограф бар, жұмыс уақыты сағат 8.00-ден 17.00-ге дейін ғана. Сонда бізде тексерілетін тұрғындар азайып кеткен бе? - дейді облыс әкімі Даниал Ахметов.
Сондықтан мәселені шешу үшін мамандарды үздіксіз оқыта беру керектігін айтқан аймақ басшысы шетелде оқитын дәрігерлердің санын бір жарым есе көбейтуге тапсырма беріп отыр.
