Өскемен мен ШҚО Ата-аналарға кеңес керек
Республиканың түкпір-түкпірінде ата-ана мен мектеп арасындағы қарым-қатынасты нығайту мақсатында конференциялар өткізіліп жатқаны белгілі
Ал ата-аналар құнды кеңестер берілетін мұндай конференциялардың жиі болғанын қалайды.
"ХХІ ғасырдағы қазақстандық ата-ана: өз балаңа үлгі бол" атты кезекті конференция Өскемен қаласының №47 орта мектебінде өтіп, бұған 3-4-сынып пен 8-9-шы сынып оқушыларының ата-аналары қатысты. Ал бұған дейін 1-сынып пен 10-11-сынып оқушыларының ата-аналарына арналып кеңес беру конференциялары ұйымдастырылған.
Мектеп директорының айтуынша, ірі көлемде өтіп жатқан мұндай конференциялар ата-аналардың қызығушылығын тудырып отыр.
- Бұған дейін үш конференция ұйымдастырдық. Қазірдің өзінде ата-аналар тарапынан түрлі ұсыныстар түсіп, берілген кеңестердің өте құнды, пайдалы екендігін айтуда. Шараның мақсаты да сол - ұрпаққа сапалы білім мен саналы тәрбие беру жолында ата-ана мен мектеп ынтымақтастығын нығайту, - дейді мектеп директоры Раушан Мухтарханова.
Іс-шара барысында ата-аналарға балалардың зиянды ақпараттар мен діни ағымдардан, компьютерге деген тәуелділіктен қорғаудың жолдары жайында кеңестер берілді. Отбасы құндылығын сақтау мен балаға адамгершілік қасиеттерді сіңіру, бала тәрбиесіне ата-ана болып көңіл бөлу жайында ойлар айтылды. Спортқа, үйірмеге беру жайында сөз қозғалды.
