Оқушылар өрттен қорғайтын суреттер салды

Өскемен қаласында өрт оқиғаларының азаймай тұрғанына байланысты ТЖД мамандары азаматтарға өрт қауіпсіздік ережелерін ескертуді тоқтатпайды.

Құтқарушылар күніне орай, қала мектептері мен жас құтқарушылар сыныптары арасында "Өртті бірге тоқтатайық" байқауы өтті. Бір ай бойы мектеп оқушылары дайындалып, түрлі материалдарды қолдана отырып жасалған өз қабырға суреттерін алып келіп жатты.

- ТЖ мамандарынан құралған әділқазылар тақырыптың толық ашылуы мен оқушылардың қылқалам шеберліктерін сарапқа салып, бағалады. Байқау қорытындысы бойынша бірнеше оқушы жеңімпаз атанды: №36, 1, 16, 19, 11, 26, 35, 37, 39 мектеп оқушыларының ойы ұшқыр болып шыққан көрінеді. Жеңімпаздардың барлығына грамота мен сыйлықтар табысталды, - деп хабарлайды Өскемен қалалық ТЖБ баспасөз қызметі.

Сонымен қатар, оқушылардың үздік суреттері өрт қауіпсіздік ережелері жазылған ескертпек қағаздарда да жарияланатын болады.