Өскеменде мазут төгілген аумақ тазаланды

2017 жылы Өскемен Жылу орталығы құрылыс салу үшін 21 гектар жер алған. Алайда кейін жер иесі бұл маңға қоймалжың қара сұйықтықтың төгіліп, жерге сіңбей жатқанын көрген.

- Бұл аумақ ұзақ уақыт қараусыз жатқан еді. Біз маңайдағы қоқыстарды жинап, аумақты ретке келтірдік, - дейді Өскемен Жылу орталығының бас экологы Марина Стрельцова.

Ал Экологиялық қауіпсіздік орталығы мамандарының айтуынша, бұл маңда мазут төгіліп жатқаны 2015 жылы-ақ белгілі болған. Оның аумағы 462 шаршы метр. Алайда жер телімін алар кезде Глубокое аудандық әкімдігі бұл маңда мұнай төгіліп жатқаны жайлы ескертпеген.

Мұнай төгілген аумақты тексерген Өскемен Жылу орталығы мазуттың радиактивтік қаупі жоқ екенін анықтаған.

- Кейін Қарағанды облысындағы компанияға жүгініп, аумақты тазалауға кірістік, - дейді Марина Николаевна.

Қазір бұл маңда мазут қалдығынан із де жоқ. Тазалау жұмыстарына 3,7 млн теңге қаржы кеткен.