Облыс әкімі: "Трамвай вагондарын қолжетімді бағамен алдық"

Бүгін түнде облыс орталығының Трамвай паркіне тағы Алматыдан әкелінген 6 вагон түсіріледі. Ал аптаның соңына дейін қалған төрт вагон межелі жеріне әкелінбек. Алғашқы әкелінген көлік легін мамандар қазірдің өзінде тексерістен өткізіп жатыр. Осы мақсат үшін саябақтың біреуі қайта жабдықталды.

- Трамвайды іске қоспас бұрын мамандар әрбір жерін, барлық электроникасын жіті тексереді, - дейді "Өскемен қаласының көлік компаниясы" ЖШС директоры Владимир Панков.

Алматылық вагондардың сыйымдылығы 230 адамға дейін болса, Өскемен трамвайларында 211 жолаушы қатынайды. Естеріңізге салсақ, 13 вагонның құны 118 млн теңгені құраған.

- Бір вагонға орта есеппен 9 млн теңге бөлінді - дейді ШҚО әкімі Даниал Ахметов. - Бұл іс жүзінде "қайырымдылық" деп атауға да болады әрі трамвайлар техникалық күйі де жақсы.