Ереже бұзған жүргізушілер ұсталды

Өйткені соңғы уақыттары қоғамдық көлік жүргізушілері тарапынан болатын оқыс оқиғалар көбейген. 

Автобус жүргізушілері қағып кеткен адамдардың көз жұмған жағдайлары болған. Сондай оқиғалардың бірі Зырянда орын алды. 14 наурыз күні жаяу жүргіншіні қағып кеткен қоғамдық көлік жүргізушісі ұсталған. Ал жүргізушінің қолында не төлқұжат, не жүргізуші куәлігі болмай шықты. Қалада неліктен маршрут басқарып жүргені де белгісіз. Ал жарақат алған тұрғын ауруханаға түсіп, кейін көз жұмды. 

23 наурыз күні Өскемен қаласының автобус жүргізушісі тағы бір тұрғынды қағып кетті. Оның да жағдайы ауыр. Өскемен қалалық ішкі істер басқармасы хабарлағандай, осы оқиғадан кейін бес күннен соң тағы бір жүргізуші қала тұрғынын қағып, ауруханадан бір-ақ шығарған. 

Аталған оқиғаларды сүзгіден өткізген тәртіп сақшылары 4-6 сәуір күндері автобус жүргізушілерін шетінен тексеріп, айыппұл салып, жазаға тартты. 

- Бірінші күннің өзінде тәртіп бұзған 160 жүргізуші ұсталды. Оның ішінде 29 жүргізуші рөлде отырып телефонмен сөйлессе, төрт жүргізуші техникалық тексеріссіз жүрген, 13 жүргізуші жылдамдықты асырған, - деп мәлімдеді ШҚО ІІД баспасөз қызметі.

Одан өзге, жолда маневр жасап, ереже бұзған 30 жүргізуші ұсталған. Ал кейбір автобус жүргізушілері жол ережелерін дөрекі бұзған. Мәселен, Өскеменде қызыл бағдаршамнан өтіп кеткен автобус жүргізушісінің ішімдік ішкені анықталған.

- Мас жүргізушінің автобусы айыппұл тұрақжайына жөнелтілді. Енді бұл жүргізуші көлік жүргізу құқығынан үш жылға айырылмақ, - дейді Өскемен қаласы ІІБ баспасөз қызметі.