Өскемен мен ШҚО Облыс әкімі Венгриядан келген салт аттымен кездесті
Венгриядан салт атпен экспедиция жасап жүрген Иштван Бенце есімді саяхатшы облыс әкімдігінен көмек сұрап келді
Мадьяр мен қазақ туыстас халық. Көне ғұнның ұрпақтары. Алтайдан Еуропаға дейінгі аумақты аттың тұяғымен жаулаған жауынгер халықтың жүріп өткен жолымен саяхаттауды мақсат тұтқан Иштван Бенце Астанадан Шыңғысханның ордасы Қарақорымға дейін сапар шегуді ойлап отыр.
- Еуразияның бірнеше елін атпен жүріп өтуді ойлап отырмыз. Бұл еуразия мәдениетінің ортақ тегін танытуға мүмкіндік береді, - дейді Иштван Бенце.
2018 жылы маусымда басталатын үш саяхатшының тарихи экспедициясы Ерейментау, Екібастұз, Павлодар, Семей, Өскемен, Үлкен Нарын, Катонқарағай жерлерін басып өтпек.
Кейін Қытайға, Азияның ішкі жағында жатқан елдеріне барып, Кәріс түбегіне барып ат тіремек.
Ал саяхатшының өзі осыған Қазақстанға 30 рет келген әрі бұған дейін екі рет экспедиция жасаған. Ал Моңғолияға дейінгі биылғы сапары – үшінші экспедициясы.
