Зейнеткер жоғалып кетті

Глубокое ауданы Белокаменка (Планидовка) ауылының тұрғыны Анатолий Егоровты туысқандары өткен жылдың 20 қарашасынан бері іздестіруде. Жоғалғанына көп уақыт өтсе де, зейнеткердің ұлы әкесінің қайтып келетініне үмітті. Жоғалудың мән жайы жұмбаққа толы. Анатолий Егоров әйелімен бірге балаларынан жеке тұрып жүрді. Жоғалар алдында қарт адам пеш жағып, отқа тамақ қойып кеткен. Үй киімімен сол күйі тысқа шығып кеткен. Полиция мен туысқандары жергілікті мекенді тегіс тінтіп шықса да, еш нәтиже болмады. - Жасына қарамастан, әкем ақыл есінен айрылатын дертке шалдықпаған. Сондықтан адасып кеткен жоқ, - дейді зейнеткердің ұлы Евгений. - Оны көрген адамдардың барлығынан көмек сұраймыз. 77 жастағы ер адамды іздеу шарасына Rina.kz қозғалысының еріктілері қосылды. Жоғалушының белгілері: бойы 168 сантиметр, толық пішінді, ақ шашты, сол қолында алты медициналық тыртық бар. Суретте көрсетілген адамды біреу кездестірсе 8 702 626 14 92, 8 777 923 73 30, 8 960 954 38 22 немесе 102 нөміріне хабарласуды сұрайды.