Өскемен мен ШҚО ШҚО әкімі мен опера әншісі Майра Мұхамедқызы халықты Тәуелсіздік күнімен құттықтады
Аймақ басшысы Даниал Ахметов пен ҚР «Еңбек сіңірген әртісі», Шығыстың тумасы Майра Мұхамедқызы өңір халқын Тәуелсіздік мерекесімен құттықтады
Бүгін облыстың драма театрдың салтанат залында Қазақстан Тәуелсіздігіне орай мерекелік шара өтіп, ең алдымен, облыс әкімі Даниал Ахметов аймақ азаматтарын Ұлы мерекемен құттықтады.
- Тәуелсіздік – бұл біз үшін киелі құндылық. Біздің міндетіміз – Тәуелсіздік жылдары жеткен жетістікті сақтай отырып, оның тұрақтылығын қамтамасыз ету, - деп атап өтті облыс әкімі.
Ал әкімнен кейін сахнаға Семей филармониясының ұлттық аспаптар оркестрінің сүйемелдеуімен «Астана Опера» театрының солисі Майра Мұхамедқызы өнер көрсетіп, шығысқазақстандықтарды, жерлестерін Тәуелсіздік күнімен құттықтады.
- Тәуелсіздік – ата-бабаларымыздың аңсап өткен жалғыз арманы. Осынау мерекеде сіздермен қауышып отырғаныма қуаныштымын. Осы күнге дейін Тәуелсіз елдің атын шығаруға, оның мәдениеті мен руханиятын өзге елде паш етуге бар күшімді салдым. Шәкіртім Димаш Құдайбергенов те егемен елдің атын әлемге танытып жүр. Бұл – біздің елді мәдениеті мен тарихының бай екендігін дәлелдейді, - деді Майра Мұхамедқызы сөз соңында.
Айта кетейік, Майра Мұхамедқызы – қазақтың ең атақты опера әншiсi (сопрано), Қазақстан Республикасының еңбек сіңірген әртісі, Мемлекеттік сыйлықтың лауреаты. Париждегі "Гранд Операда" Қазақстанның атынан өнер көрсеткен тұңғыш әрі әзірге жалғыз опера әншісі.
Следующая →
