Өскемен мен ШҚО Семейдегі лицей директоры пара алу үстінде ұсталды
Мектеп директоры параны ақшалай емес, заттай алған. Ал пара алғаны үшін оған 3 миллион теңге айыппұл салынды
Сот мәліметтеріне сүйенсек, Семей қаласында орналасқан №7 мектеп-лицейінің 55 жастағы директоры ауданда тіркеуде тұрмаған екі қыз баланы мектепке қабылдау үшін ата-анасынан пара сұраған. Параны ақшалай талап етпеген. Директор ата-анадан автокөлікке қысқы дөңгелек сатып әкелуін өтінген. Алайда кейін ойлана келе дөңгелек емес, автокөлікке қажетті радары бар бейнетіркеуішті әкелсе жеткілікті екендігін айтқан.
Ата-анасы директор талап еткен бейнетіркеуішті сатып әкеліп, табыстаған. Алайда сатып алардың алдында олар тиісті құқық қорғау органдарына хабарлаған.
1999 жылдан бері директорлық қызметте жүрген азаматтың ісі сотта қаралып, оған 3 млн 175 мың теңге айыппұл салынды. Әрі өмір бойы мемлекеттік қызметте жұмысқа қабылданбау және жеке үй мүлкін тәркілеу жөнінде шешім шығарылды.