Өскемен мен ШҚО Мектеп оқушыларына смартфон қолдануға тыйым салынды
Облыстық прокуратура мен білім беру басқармасы ата-аналармен ақылдаса келе, мектеп оқушыларына смартфон қолдануға тыйым салды
Прокуратура мектепте ұры-қарылықты азайту үшін, ал білім беру мекемесі оқушылардың телефонға деген кіріптарлығын жою үшін мұғалімдермен, ата-аналармен ақылдаса отырып, осындай шешімге келген. Облыстағы мектептердің барлығында смартфон қолдануға тыйым салынған.
- Облыста орналасқан 659 мектептің 579-ында смартфон пайдалануға тыйым салынды. Ал қалған 80 мектепке тыйым салудың қажеті жоқ. Өйткені бұл мектептер телефон операторлары тартылған мекенде орналаспаған немесе онда тек бастауыш сыныптың балалары ғана оқиды, - деп хабарлайды ШҚО прокуратурасының баспасөз қызметі.
Ал құқық қорғау органы мектеп оқушыларының ұялы телефонды көп жоғалтатынын әрі жасөспірімдер арасында телефон ұрлығы көп екендігін айтып отыр. Сондықтан білім беру мекемелерінде смартфон қолдануға тыйым салынса, қылмыс азаяды деп күтілуде.
