Шығыста шөп өрті толастар емес

Шығыс Қазақстанда үш күн ішінде 200 тоннаға жуық шөпті тілсіз жау шарпыған. Өткен жұма күні Шар қаласындағы жер үйлердің бірінде 20 тонна шөп өртеніп кеткен. Дәл сол күні Ертіс ауылдық округіндегі «Васюха» телімінде 130 тонна мал азығы мен 35 гектар құрғақ шөп өртенген. Өрт сөндірушілерге тілсіз жауды ауыздықтауға 10 сағат қажет болған. ШҚО ТЖД баспасөз қызметінің ақпараттарына сүйенсек, Үржар ауданындағы екі ауылда және Зайсан ауданындағы Жаңатұрмыс ауылында да осындай жағдай тіркелген. Ал жексенбі күні Бородулиха ауданындағы Переменовка ауылында ашық алаңда жатқан 10 тонна шөп өртке оранды. Алдыңғы тіркелген жағдайларда өрт қауіпсіздік шараларына салғырт қарау себеп болса, бұл жолы жергілікті тәртіп сақшылары өрт қасақана қойылуы мүмкін дегенді алға тартады. Жалпы үш күн ішінде өрт сөндірушілер 189 тонна өртенген шөпті сөндірген.