Өскемен мен ШҚО Зайсан қаласында тұрғын үй салынбақ
Қазіргі уақытта Зайсан қаласында 60 пәтерлі екі тұрғын үй салынып жатыр. Алдағы уақытта тағы да екі жүз пәтерлі үй салынуы мүмкін
Зайсан қаласының Кондюрин көшесінде мамыр айында құрылысы басталған 60 пәтерлі екі тұрғын үй келесі жылы аяқталмақ. Бұған 120 отбасы қоныстанады. Құрылысқа құйылған қаржының сомасы 480 млн теңгені құрайды.
Облыс әкімі Даниал Ахметов ауданда халық санының көбейіп келе жатқандығын ескере отырып, тағы да тұрғын үй салуға қазынадан қаржы бөлуге әзір екендігін жеткізді.
- Алдымен, Тұрғын үй құрылыс жинақ банкіне пәтер құнының 30 пайызын құйған аудандағы салымшылардың тізімін жасауымыз қажет. Тізімде қанша тұрғын бар, соның барлығына үй тұрғызуымыз керек. Кейін салымның 30 пайызын жинаған тұрғындардың барлығын пәтермен қамтамасыз етеміз. Мен қаржы бөлуге дайынмын, - дейді Даниал Ахметов.
Қазіргі уақытта Зайсан ауданында ТҮҚЖБ-на қаржы құйған салымшылардың саны - 3500-ге жуық. Ал Зайсан қаласында 17 мыңнан астам тұрғын қоныстанған болса, ауданның өзінде 40 мыңға жуық халық қоныс тепкен.