Өскемен мен ШҚО ШҚО-да орман өртке оранды
Кеше найзағайдың салдарынан Күршім ауданындағы Пугачев мемлекеттік орман қорының аумағындағы орманда өрт шыққан
Кеше күндізгі сағат үш кезінде «Қазақәуекүзеті» РМҚК патрульдік ұшағы аймаққа шолу жасау барысында Пугачев мемлекеттік орман қорының аумағындағы орманда өрт шыққандығын анықтады. Оқиға орнына дереу он десант түсірілген.
- Жалын найзағайдан шыққан, - дейді «Қазақәуекүзеті» РМҚК ұшу қызметінің инспекторы Владимир Санаров. - Өрттің бірінші ошағы сөндірілді, шығын жоқ. Ал екінші ошаққа десант жеткізіліп, жердегі орман күзеті хабардар етілді. Орман алыста әрі оған апарар көлік жолы жоқ болғандықтан салт атты баруға тура келді.
Қазір әлі сөндірілмеген ошақтарда жердегі орман күзеті қызметі мен десантшылар жұмыс жасауда. Қосымша күш жұмылдырудың қажеті жоқ. Өрт алаңы - бір гектар.
