Әлеуметтік желідегі суреті үшін сөгіс алды

Бұл туралы әдеп жөніндегі кеңес отырысы барысында белгілі болды. ШҚО Әділет департаменті басшысының орынбасары Бейсембек Әл-Сейіт мекеменің атқарып жатқан жұмыс қорытындысы туралы айтып, мемлекеттік қызметкерлердің этикалық кодекс нормаларын бұзғанын да назардан тыс қалдырмады. Оның айтуынша, өткен жылы департаменттің екі қызметкері жұмыстан тыс уақытта өздерін ерсі ұстағаны үшін жазаланған. 
Олардың бірінің әлеуметтік желіге салған суреті желі қолданушыларына ұнамай қалған. 
- Т. есімді маман әлеуметтік желіге сурет салып, ол халықтың сынына іліккен, - деп атап өтті Бейсембек Қанайбекұлы. - Қызметтік тексеріс жүргізуге ШҚО Әділет департаментінің ресми сайтына келіп түскен жеке тұлғаның өтініші негіз болды. 
Осы әрекеті үшін мекеме басшылығы қызметкеріне сөгіс жариялап, ескерту жасаған. Ал қоғамдық орында мас күйінде жүріп, мемлекеттік қызметкердің этикалық кодексін бұзған тағы бір мекеме қызметкері әкімшілік жауапкершілікке тартылды.

Назерке Кәрімова