Өскемен мен ШҚО ШҚО-да кәсіпкер болғысы келетін оқушылар мен студенттерге арналған байқау өтеді
Мектеп оқушылары мен студенттерге арналған "Мен – кәсіпкермін" байқауы өңірде 9-шы жыл қатарынан өткізіліп келеді
Бұл жоба алғаш рет дәл Шығыс Қазақстанда бастау алған, ал бүгінгі таңда республикалық деңгейде де жүзеге асырылуда, деп хабарлайды Устинка LIVE тілшісі.
Бастама Қазақстан Республикасы Оқу-ағарту министрлігінің қолдауына ие.
Байқауды облыстық білім басқармасы, "Атамекен" ШҚО Кәсіпкерлер палатасы, Қазақстан-Америка еркін университеті мен Өскемен экономика және техника колледжі ұйымдастырады.
Турнирге 14 пен 20 жас аралығындағы мектеп оқушылары мен колледж студенттері жеке немесе үш адамға дейінгі команда құрамында қатыса алады.
1 сәуірдегі жағдай бойынша 79 өтінім қабылданып, 19 колледж бен облыстың 12 мектебінен 118 қатысушы тіркелген, - дейді Өскемен экономика және техника колледжінің директоры Ерсайын Нәбиев. - Байқау бірнеше кезеңнен тұрады: оқу орындарындағы ішкі іріктеуден бастап жобаларды сараптамалық бағалауға дейін. Турнирдің финалы 20 сәуірде бизнес-идеяларды көпшілік алдында қорғау форматында өтеді.
Қатысушылардың жұмыстары заманауи экономиканың негізгі салаларын қамтитын он бағыт бойынша бағаланады:
- әлеуметтік кәсіпкерлік;
- сауда;
- қонақүй ісі және қоғамдық тамақтандыруды ұйымдастыру;
- өндіріс, технологиялар және ауыл шаруашылығы;
- шоу-бизнес, мәдениет және өнер;
- дизайн және креативті индустриялар;
- білім беру, ақпарат және цифрлық технологиялар;
- медицина, денсаулық сақтау және сұлулық индустриясы;
- туризм;
- көлік және логистика.
Жеңімпаздар республикалық кезеңге жолдама алады. Осы орайда айта кету керек, шығысқазақстандықтар 2024 жылы бір екінші орын, ал 2025 жылы екі үшінші орын иеленген.