Өскемен мен ШҚО Өскемен тұрғыны дүкеннен 80 қорап шоколад ұрлаған
Ол облыс орталығындағы ірі сауда орталықтарының бірінен екі ай бойы тәтті ұрлап жүрген
Осылайша тәттіқұмар азамат сауда орнына 250 мың теңге шығын келтірген, деп хабарлайды Устинка LIVE тілшісі.
Тергеу мәліметтері бойынша, 2026 жылдың қаңтар-ақпан айлары аралығында ер адам сауда залынан ешкімге білдірмей, қойнына жасырып шоколад ұрлаған. Ол жалпы саны 80 қорап "Merci" шоколадын жымқырған. Бұдан бөлек, күдікті косметикалық құралдарды, азық-түлік пен жеке гигиена заттарын да қолды қылған, - деп хабарлайды ШҚО ПД баспасөз қызметі. - Осындай заңсыз әрекеттердің салдарынан сауда ұйымына 250 мың теңгеден астам материалдық шығын келтірілді.
Кезекті ұрлық әрекеті кезінде күдіктінің жеке басы ШҚО ПД Жедел басқару орталығының бейнебақылау камераларының көмегімен анықталып, ұсталды.
Қазіргі уақытта аталған факті бойынша тергеу амалдары жүргізілуде. Күдіктіге қатысты "күзетпен ұстау" бұлтартпау шарасы таңдалды.