Өскемен мен ШҚО Жаңа Конституцияда адами капиталды дамытуға ерекше назар аударылған
Өскемен қаласындағы Достық үйінде №7 және №8 бастауыш партиялық ұйымдарының өкілдерімен кездесу өтті
Кездесуге "Әділетті және Прогрессивті Қазақстанның Халықтық Конституциясы үшін!" өңірлік коалициясының мүшелері қатысып, жаңа Конституция жобасының маңыздылығын түсіндірді, деп хабарлайды Устинка LIVE тілшісі.
Жиын барысында қатысушыларға жаңа Ата заңда қарастырылған негізгі өзгерістер, ел дамуына бағытталған бастамалар мен азаматтардың құқықтарын қорғау тетіктері туралы кеңінен айтылды. Сондай-ақ коалиция мүшелері жиналған қауымды 15 наурызда өтетін референдумға белсенді қатысуға шақырды.
Жаңартылған Конституцияның 3-бабында адами капиталды, білім беруді, ғылым мен инновацияны дамыту мемлекет қызметінің стратегиялық бағыты ретінде ресми танылатыны көрсетілген. Бұл – білімді табиғи ресурстардан жоғары қоятын іргелі қадам. Жастар үшін бұл білім беру бағдарламаларын, ғылыми зерттеулерге арналған гранттарды басым қаржыландыруды және әлемдік деңгейдегі білім алуға мүмкіндік беретін инфрақұрылым қалыптастыруды білдіреді. Себебі прогресс пен білім құндылықтары енді жоғары құқықтық деңгейде қорғалады, – деді коалиция мүшесі Анжела Горностаева.