Өскемен мен ШҚО ШҚО жастары әскери борышын өтеуге оңтүстікке аттанды
Шығыс Қазақстаннан әскерге аттанған 23 сарбаз Ұлттық ұланның Алматы қаласындағы №5571 әскери бөлімінде Отан алдындағы борышын өтейді
Шығыс жұрты жастарды әскери оркестрдің сүйемелдеуімен шығарып салды, деп хабарлайды Устинка LIVE тілшісі.
Күзгі шақырылымда Ұлттық ұлан сапына қосылатындардың бірі – Азамат Мұратов. Ол Отан қорғау әрбір ер жігіттің парызы деп біледі. Сол себепті оқуын бітіре салысымен әскерге барамын деп шешкен.
Мен Риддер қаласының тумасымын. Біздің жақтың қысы да қатал, жазы да салқын. Спортты бойыма серік етіп, табиғаты қатал өңірде физикалық қабілетімді шыңдадым. Ертең әскерге барғанда шығыстың жігіттерінің шымыр екендіктерін көрсеткім келеді. Ұлттық ұлан сапында Отан алдындағы борышымды абыроймен өткеремін деген сенімдемін. Болашақта әскери саланың маманы болғым келеді, - дейді әскерге шақырылушы.
Сап түзеген шығыстың жастары алдағы бір жылда әскери өмір мектебінен өтеді. Темірдей тәртіпке бой үйретіп, жауынгерлік өнерге машықтанады. Олар Бауыржан Момышұлы атындағы бригада сапында оңтүстік астананың қоғамдық тәртібін қадағалауға міндетті. Салтанатты шара барысында ата-аналар қауымы да жас толымға жылы лебіздерін жолдады.
Бала күнінен әскери қызметші болуды армандайтын балам әскерге аттанып жатыр. Көңілде қобалжу барын жасырмаймын. Алып мегаполистегі түрлі шаралардың қауіпсіздігін қамтамасыз етіп, қоғамдық тәртіпті қадағалайды екен. Бұл да сарбазға жүктелген жауапты міндет. Әскердің жасөспірімнің нағыз ер азамат болып қалыптасудағы рөлі зор деп санаймын, - дейді әскерге шақырулышының анасы Әсем Тұрсынғазықызы.