ШҚО-ның балы Еуропа елдеріне сатыла бастады

Бұл туралы ШҚО әкімі Нұрымбет Сақтағанов Орталық коммуникациялар қызметінде өткен брифингте мәлімдеді, деп хабарлайды Устинка LIVE тілшісі.

Биыл өңірде астық өнімділігі 101,5%-ға, майлы дақылдардың өнімділігі 107%-ға артты. Экспорттағы өңделген өнім үлесі 66%-дан 71%-ға жетті. Цифрлық жүйені пайдалану арқылы егістік жерлердің 40%-ы өнімділікті гектарына 30 центнерге арттыруға мүмкіндік берді. Агроөнеркәсіп кешенінде сыртқы ынтымақтастықты нығайту мақсатында Қытай, Ресей және Өзбекстан елдерімен өзара іс-қимыл жолға қойылған.

Жерлестеріміз Еурокомиссия тізіміне енген алғашқы қазақстандық кәсіпорын ретінде Еуропаның 27 еліне шығыстың балын жеткізу мүмкіндігіне ие болды, - деді спикер ОКҚ алаңында өткен баспасөз конференциясында.

Балық шаруашылығында да өңір көш бастап тұр. Биыл 2,5 мың тонна тауарлы балық өндіріледі.