Өскемен мен ШҚО "Таза Өскеменнің" бұрынғы басшысы 120 млн теңге жымқырған
Кәсіпорынның бұрынғы директоры мен оның орынбасары қала көшелерін күтіп ұстауға бөлінген бюджет қаражатын қалтасына басқан
Күдіктілер бұл ақшаға Өскемен қаласындағы қымбат тұрғын үй кешенінен пәтер, "BMW X6M" және "Subaru Forester" автокөліктерін, сондай-ақ жер учаскелерін сатып алған, деп хабарлайды Устинка LIVE тілшісі.
ҚМА Шығыс Қазақстан облысы бойынша департаменті "Таза Өскемен" шаруашылық жүргізу құқығындағы коммуналдық мемлекеттік кәсіпорнының бұрынғы басшылығына қатысты қала көшелерін күтіп-ұстауға бөлінген бюджет қаражатын жымқыру дерегі бойынша сотқа дейінгі тергеп-тексеруді жүргізуде.
Күдіктілердің арасында кәсіпорынның бұрынғы директоры, оның орынбасары және жеке кәсіпкер бар.
Лауазымдық өкілеттіктерін пайдалана отырып, күдіктілер 2022-2023 жылдар аралығында мемлекеттік сатып алу рәсімдерін өткізбестен, жүйелі түрде бюджет қаражатын өздерімен байланысы бар коммерциялық құрылымдардың есепшоттарына заңсыз аударып отырған, - деп мәлімдеді ҚМА ШҚО бойынша департаменті. - Атап айтқанда, құжаттарда жолдарды жөндеуге арналған битум мен құм сатып алу, суды соруға арналған арнайы техника жалдау, сондай-ақ бұған дейін орнатылған 23 аялдама павильонын жасауға қажетті материалдар сатып алу туралы жалған деректер көрсетілген. Кейін бұл қаражат жеке кәсіпкер арқылы қолма-қол ақшаға айналдырылып, схемаға қатысушылар арасында бөлінген.
Келтірілген залалдың жалпы сомасы 120 млн теңгеден асты.
Қылмыстық жолмен алынған табысқа күдіктілер Өскемен қаласындағы қымбат тұрғын үй кешенінен пәтер, "BMW X6M" және "Subaru Forester" автокөліктерін, сондай-ақ жер учаскелерін сатып алған. Аталған мүлікке сот санкциясымен тыйым салынды.
Кәсіпорынның бұрынғы директоры екі ай мерзімге қамауға алынған. Тергеу жалғасуда.