Өскемен мен ШҚО ШҚО-да наркограффитиге қатысты 8 қылмыстық іс қозғалды
Өскемен қаласында есірткі сататын онлайн-дүкендер мен есірткі таратушыларды жұмысқа тартатын жарнама жазуларды өшіру бойынша ауқымды шара өтті
Акцияға қала прокуратурасының, полицияның, жергілікті атқарушы органдардың қызметкерлері және жастар қозғалысының белсенділерінен құралған 100-ге жуық адам қатысты, деп хабарлайды Устинка LIVE тілшісі.
Тұрғын үй аулаларын аралау барысында 50-ден астам есірткі граффитилері анықталды. Рейдтердің нәтижесінде "Есірткі құралдарын насихаттау немесе заңсыз жарнамалау" бойынша 8 қылмыстық іс қозғалды (ҚР ҚК 299-1-бабы), - деп мәлімдеді Шығыс Қазақстан облысының прокуратурасы.
Мұндай жазуларды жазу – қылмыс және қылмыскер ауыр жазаға тартылады, тіпті бас бостандығынан айырылуы мүмкін.
Облыс прокуратурасы тұрғындарды мұқият болуға шақырады: күмәнді жазуларды байқаған бойда дереу полицияға хабарлау қажет.
