Өскемен мен ШҚО ШҚО-ға неміс кәсіпкерлері инвестиция құюы мүмкін
Сондай-ақ, өңірге неміс өнерпаздары келіп, концерт қою жоспарлануда
Бұл туралы ШҚО әкімі Нұрымбет Сақтағановтың Германия Федеративтік Республикасының Қазақстандағы Елшісі Моника Иверсенмен кездесуі кезінде айтылды, деп хабарлайды Устинка LIVE тілшісі.
Тараптар екіжақты ынтымақтастықты талқылап, түрлі салада бірлесе жұмыс істеу жайында сөз қозғады.
Еліміздегі су ресурстарының 40 пайызы біздің өңірде шоғырланған. Түрлі минералдарға бай облыстың тамылжыған табиғаты туризм саласын дамытуға да зор мүмкіндіктер жасайды. Германиямен жасыл энергетика, цифрландыру және білім саласында бірлескен жұмыстарды қолға алуға әзірміз. Сіздің осы сапарыңыз арадағы ынтымақтастықты күшейте түседі деп сенемін, - деді Нұрымбет Сақтағанов.
Германия Федеративтік Республикасының Қазақстандағы Елшісі өз сөзінде арадағы байланысты нығайта түсуге ниетті екендіктерін білдіріп, неміс кәсіпкерлерін Шығыс Қазақстанға инвестиция құюға шақыратынын жеткізді. Сондай-ақ өлкеде неміс өнерпаздарының концертін өткізіп, мәдени байланысты да арттыра түсуге ұсыныс білдірді.