Өскемен мен ШҚО Өскеменде АЭС мамандары даярланатын болады
Д. Серікбаев атындағы ШҚТУ-да "Атом электр станциясын пайдалану" атты жаңа білім беру бағдарламасы енгізіледі
Бұл бағдарлама Халықаралық атом энергиясы агенттігінің (МАГАТЭ) сарапшыларының қатысуымен әзірленіп, еліміздегі алғашқы атом электр станциясына қажетті жоғары білікті мамандарды даярлауға бағытталған, деп хабарлайды Устинка LIVE тілшісі ШҚО әкімдігі ақпаратына сүйеніп.
МАГАТЭ сарапшыларының ұсыныстарына сәйкес дайындалған оқу жоспары ядролық энергетика саласының негізгі аспектілерін қамтиды. Оқытылатын пәндер қатарында атом станцияларының жабдықтары, ядролық реакторлар физикасы, радиациялық қауіпсіздік, ядролық отын циклі, жабдықты жаңғырту мен монтаждау сияқты маңызды бағыттар бар. Сонымен қатар, студенттер теориялық біліммен қатар Курчатов қаласындағы Ұлттық ядролық орталықта және Өскемендегі металлургиялық зауытта тәжірибеден өтеді.
2025 жылғы сәуірде университет қабырғасында МАГАТЭ мен Ресейдегі Ұлттық зерттеу ядролық университеті МИФИ өкілдерінің қатысуымен халықаралық форум өтіп, онда атом саласындағы білім беру мен кадрлық әлеуетті дамыту мәселелері талқыланды.
Бағдарламаның академиялық комитетіне университеттің жетекші оқытушылары мен өндіріс өкілдері кірді, олардың қатарында "ҮМЗ" АҚ ғылыми орталығының бастығы Манарбек Қылышқанов бар. Сонымен қатар, 2025 жылдың маусымында бағдарлама оқытушылары Айжан Байділдина мен Надежда Прохоренкова Венгриядағы атом электр станциясында тағылымдамадан өтті. Ал қазан айында мектеп деканы Айбек Ақаев Венада өтетін МАГАТЭ-нің StarNet желісі отырысына қатыспақ.
Бағдарлама халықаралық ядролық қауіпсіздік талаптарына толық сай келеді. Бұл өз кезегінде Қазақстанның атом энергетикасы саласындағы кадрлық резервін қалыптастырып қана қоймай, елдің энергетикалық қауіпсіздігін нығайтып, технологиялық тәуекелдерді азайтуға ықпал етеді. Бағдарлама алғашқы іске қосылған жылы-ақ халықаралық стандарттарға сай алғашқы аккредиттеуден өтуге дайындалуда.