ШҚО-да бір айда 20 келіден астам есірткі тәркіленді

Синтетикалық есірткі мен олардың заңсыз айналымына қарсы жұмыстар күшейтіліп, есірткі таратушылар ұсталып, астыртын зертханалар жабылды, деп хабарлайды Устинка LIVE тілшісі.

1 маусымнан бастап 31 қазанға дейін өңірде "Қарасора-2025" жедел-профилактикалық іс-шарасы өтіп жатыр. Негізгі міндет - есірткі таратумен айналысатын ұйымдасқан топтарды анықтап, тоқтату және заңсыз өсімдіктерді өсіру мен таратуға тосқауыл қою.

Нашақорлық пен есірткінің заңсыз айналымы - бүгінде бүкіл республика үшін ең өзекті мәселелердің бірі. Бұл - тек құқықбұзушылық емес, қоғам мен мемлекеттің қауіпсіздігіне төнетін тікелей қатер. Сондықтан оған қарсы күресте тек жазалау емес, жүйелі және пәрменді шаралар қажет, - деді ШҚО ПД Есірткі қылмысына қарсы іс-қимыл басқармасының бастығы Даулет Жұмаділов.

Полицейлердің мәліметінше, жедел профилактикалық шаралар басталғалы есірткіні "жасырып кету" әдісімен таратпақ болған бірнеше адам ұсталды. Олардан мефедрон мен альфа-PVP секілді синтетикалық психотроптық заттар тәркіленген. Қазіргі уақытта барлық күдіктілер уақытша ұстау изоляторына қамалып, тергеу амалдары жүргізілуде.

Сонымен қатар, есірткі өсірілген төрт жасырын фитозертхана арнайы техниканың көмегімен жойылды.

Алайда есірткімен күрес тек қылмыскерлерді ұстаумен шектелмейді. ҚР Ішкі істер министрлігі жариялаған "Профилактика жылы" аясында облыста жастар арасындағы нашақорлықтың алдын алуға бағытталған жұмыстар да белсенді жүргізілуде. Мектептерде, колледждер мен жоғары оқу орындарында 300-ден астам профилактикалық шара ұйымдастырылып, 71 мыңнан астам адамды қамтыған.