Өскемен мен ШҚО ШҚО-да алғаш рет паравелоспорт пен паратеннистен спартакиада өтті
ШҚО-да мүмкіндігі шектеулі жандар арасындағы VII республикалық спартакиаданың жабылу салтанатына облыс әкімі қатысты
Спартакиада 17 спорт түрі бойынша өткен болатын, деп хабарлайды Устинка LIVE тілшісі.
Бұл – жай ғана спорттық шара емес, бұл – рухтың мықтылығының, жігердің және баршаға тең мүмкіндіктердің көрінісі. Биылғы спартакиада еліміздің бес өңірінде – Астана мен Алматы қалаларында, Шығыс Қазақстан, Жамбыл және Ақмола облыстарында өтті. Жарыс бағдарламасына 17 спорт түрі енгізіліп, соның ішінде паравелоспорт пен паратеннис алғаш рет ШҚО-да ұйымдастырылды. Әкімдік атынан ұйымдастырушыларға, бапкерлерге, төрешілерге, еріктілерге және спортшыларға лайықты қатысқандары, әділ күрестері мен қоғамға рухани жігер сыйлағандары үшін алғысымды білдіремін. Әрбір қатысушы тек медаль ғана емес, сонымен қатар жаңа күш, тәжірибе мен өзіне деген сенім алып кетсін. Сіздерге сәттілік, мықты денсаулық және жаңа жеңістер тілеймін! – деді облыс әкімі Нұрымбет Сақтағанов.
Бүгінде Шығыс Қазақстан облысында 311 708 адам спорт және дене шынықтырумен айналысады. Оның ішінде 4053 адам – мүмкіндігі шектеулі жандар, 1677-сі – балалар.
Облыста барлығы 1628 спорттық инфрақұрылым нысаны, 35 спорт мекемесі жұмыс істейді. Олардың қатарында мүмкіндігі шектеулі жандарға арналған спорт клубы, олимпиадалық резервті даярлау орталығы, жоғары спорт шеберлігі мектептері, дәрігерлік-дене шынықтыру диспансері, дарынды спортшы балаларға арналған олимпиадалық резервтің арнайы мектеп-интернат-колледжі және балалар мен жасөспірімдер спорт мектептері бар.
