Өскемен мен ШҚО Қатонқарағай ауданында этноауыл бой көтеріп, этно қонақ үй салынады
Одан өзге, Өскемен қаласында этномейрамхана мен этнокофехана ашылады
Бұл жобалар инвесторлардың көмегімен жүзеге аспақ, деп хабарлайды Устинка LIVE тілшісі.
Шығыс Қазақстан облысында ауылдық елді мекендер мен туризмді дамыту аясында бірнеше инвестжоба жоспарланған. Мәселен, Катонқарағай ауданында этноауыл мен этно қонақ үй, ал облыс орталығында этномейрамхана мен этнокофехана салынбақ.
Инвесторлардың көмегімен "Сандық" этномейрамханасы мен "TARY" этнокофеханасын салу көзделуде. Этномейрамхананың ашылуы ұмыт болған дала асханасының мәзірін қайта жаңғыртуға, пайдалы тағамдарды әзірлеу дағдыларын дамытуға және жалпы халық дәстүрінің тереңіне үңілуге мүмкіндік береді, - деп мәлімдеді ШҚО әкімінің баспасөз қызметі. - Ал қазақ асханасына тән этнокофехананың ашылуы – өзінің мақсат-міндеттері бойынша мүлде жаңа жоба. Бұл жоба пайдалы сусындарды дайындауға бағытталған. Мәселен, кофе дәндерінің орнына өңделген тары, сондай-ақ Шығыс Қазақстанның жидектері мен шөптері пайдаланылатын болады.
ШҚО әкімі Нұрымбет Сақтағановтың айтуынша, облыста отандық және шетелдік туристерді тартуға қолайлы жағдай жасау мақсатында жүйелі жұмыстар жүргізілуде.