ШҚО-да балық аулауға тыйым салынды

Өңірде уылдырық шашу кезеңі 16 сәуірден басталадыы, деп хабарлайды Устинка LIVE тілшісі.

Зайсан көлінде және Қарақастан бірінші Батин шоқысына дейінгі Бұқтырма су қоймасының көл-өзен бөлігінде 16 сәуiрден 30 мамырға дейін, бірінші Батин шоқысынан Бұқтырма СЭС дейiн Бұқтырма су қоймасының терең бөлігінде 1 мамырдан 15 маусымды қоса алғандағы аралықта балық аулауға тыйым салынады, - деді ШҚО Табиғи ресурстар және табиғат пайдалануды реттеу басқармасы басшысының орынбасары Мерхат Амиров.

Бұған қоса, Өскемен су қоймасында, Ертіс өзені Өскемен СЭС-нан Шүлбі су қоймасына дейін 10 мамырдан 10 маусымды қоса алғандағы, Шүлбі су қоймасында, Ертіс өзенінде Шүлбі СЭС-нан Павлодар облысының әкімшілік шекарасына дейін 16 сәуірден 30 мамыр аралығында балық аулауға болмайды. Бұл шектеулер табиғи көбею үдерісін сақтау үшін енгізіліп отыр.

Мұндай кешенді шаралар Қазақстандағы балық шаруашылығын жүйелі дамытуға бағытталған мемлекеттік саясатпен тығыз байланысты. Себебі табиғи су айдындарындағы балық қоры шектеулі болғандықтан, қазіргі таңда мемлекет пен сала мамандары жасанды балық өсіруге бет бұрып отыр.

Осы мақсатта 2021–2030 жылдарға арналған балық шаруашылығын дамыту бағдарламасы қабылданып, нәтижесінде көптеген шаруашылықтар акваөсірумен айналыса бастады. Мәселен, 2024 жылдың өзінде Ертіс бассейнінде 2671 тонна тауарлық балық өндірілген, бұл көрсеткіш жылдан жылға артып келеді.