Өскемен мен ШҚО Өскеменде әскерилер тәжік-ауған шекарасында қаза болған жауынгерлерді еске алды
Шара "Шығыс" өңірлік қолбасшылығына қарасты №5518 әскери бөлімінде ұйымдастырылды
Тәжік-ауған қақтығысында қаза болған 17 жауынгер құрметіне бір минут үнсіздік жарияланып, ескертікішке гүл шоқтары қойылды, деп хабарлайды Устинка LIVE тілшісі.
Бұл кейінгі толқын жас буын өкілдерін әскери-патриоттық рухта тәрбиелеу және де қыршыннан қиылған боздақтар ерлігін насихаттау, Отан тыныштығы мен қоғам қауіпсіздігін күзетіп жүрген ұландық жауынгерлердің рухын асқақтату үшін қажет шара.
Біз Пшихавр шатқалындағы ұрыс-соғыс оқиғасында қаза болған ағаларымыздың рухына бас иіп, тағзым етеміз. Қазақ қашанда "Ер – елдің қорғаны" деп, ер-азаматтың қоғам алдында биік бағасын асырып, мерейін тасыта білген халық. Сондықтан азаматтық пен батырлықтың биік үлгісін көрсеткен сарбаздар ерлігі қашанда ел жадында сақталары сөзсіз, - дейді "Шығыс"өңірлік қолбасшылығы қолбасшысының кеңесшісі, ардагерлер кеңесінің төрағасы отставкадағы полковник Айдар Оразбаев.
Сарбаздардың рухына тағзым етуге тәжік-ауған шекарасында өз әскери борышын өтеген ардагерлер мен "Жас бүркіт" кадеттер құрамы келді. Шара соңында тәжік-ауған әскери қақтығыстарына қатысқан ардагерлер алғыс хаттармен марапатталды.
