ШҚО-да қырыққабат, қант және сиыр еті қымбаттаған

Бұл туралы ШҚО Кәсіпкерлік және индустриялық-инновациялық даму басқармасының басшысы Ардақ Мадиев айтты, деп хабарлайды Устинка LIVE тілшісі.

Қырыққабат бағасының өсуі оны сақтау шығындарының артуымен және өнімнің табиғи кемуімен байланысты, бұл маусымдық құбылыс. Қанттың қымбаттауы бензин бағасының көтерілуіне байланысты тасымалдау шығындарының артуынан орын алды. Ал сиыр етіне бағаның өсуі мал сою көлемінің төмендеуі мен ет өнімдерін экспорттаудың артуымен түсіндіріледі, – деді Ардақ Мадиев.

Бағаны тұрақтандыру мақсатында өңірде бірқатар шаралар қолға алынуда. Картоп бағасы күрт қымбаттаған тұста "Алтай" көтерме-үлестіру орталығына 175 тонна картоп сатып алынып, 245-260 теңге аралығында ұсынылды. Қазіргі таңда оның 75 тоннасы сатылымда. Сонымен қатар, Өскемендегі ірі сауда желілерімен және дүкендермен келісім жасалып, картопқа қойылатын үстемеақы 15%-дан аспау керектігі белгіленді.

Көкөніс бағасын тұрақтандыру үшін облыстық бюджеттен 4,5 млрд теңге бөлінді. "Ертіс" ӘКК" АҚ 1,1 млрд теңге көлемінде несие бөліп, сауда желілері арқылы бағаларды реттеуге атсалысуда. Бүгінде әлеуметтік дүкендерде картоп – 130 теңге/кг, сәбіз бен қырыққабат – 120 теңге/кг бағасымен сатылуда.

Өңірде азық-түлік бағасына күнделікті мониторинг жүргізіліп, сауда орындарындағы үстемеақының 15%-дан асып кетпеуі қадағаланып отыр. Тексеру комиссиясының жұмысы барысында 86 заңбұзушылық анықталды, оның 82-сі расталды. Сауда үстемесін заңсыз көтергені үшін 49 кәсіпкерге іс қозғалып, 33 дүкенге баға көрсеткіштері болмағаны үшін айыппұл салынды, - деді басқарма басшысы.

Айта кету керек, азық-түлік бағасын тұрақтандырудың тиімді жолдарының бірі – ауыл шаруашылығы жәрмеңкелері. Биыл өңірде 160 жәрмеңке өткізіліп, жалпы құны 563,3 млн теңгенің өнімі сатылған.