Арзан пәтер алғысы келген ШҚО тұрғындары 56 млн теңгені алаяққа ұстатты

ШҚО полиция департаментіне бір азаматшаның арбауына іліккен алты азамат арызданған, деп хабарлайды Устинка LIVE тілшісі.

Мемлекеттік бағдарлама арқылы арзан баспана алып беремін деп уәде еткен азаматша адамдардан ірі көлемде ақша алған.

Тергеу барысында белгілі болғандай, Өскемен тұрғыны әріптесіне өзінің анасының байланыс нөмірін ұсынып, оның баспана алуға көмектесе алатынын айтқан. Аталған ақпарат ауыздан-ауызға тарап, таныстар мен туыстар да осы көмекшінің қызметін пайдаланғысы келген, - деп мәлімдеді ШҚО ПД баспасөз қызметі. - Азаматтар күдіктіге миллиондаған теңге берген, алайда уәде етілген пәтерлердің кілтін алмаған. Кейін әйел адам тіпті байланысқа шығуын тоқтатқан. Нәтижесінде жалпы шығын 56 000 000 теңгені құраған.

Қазіргі уақытта полиция күдіктіні анықтап, тергеу амалдарын жүргізуде.

ШҚО Полиция департаменті азаматтарға қаржылық операциялар кезінде сақтық танытуды ескертеді. Ақша аудармас бұрын ақпаратты тексеру қажет, бейтаныс адамдарға тіпті ақша беруге болмайды. Кез келген мәселе бойынша келісімшарт жасаспас бұрын мамандармен кеңесу қажет. Күмән туындаған жағдайда құқық қорғау органдарына хабарласқан жөн.