Өскемен мен ШҚО Өскеменде ваучерлік қаржыландыру балаларды балабақшаларға қабылдау тәртібін өзгертпек
Ағымдағы жылдың наурыз айынан бастап Өскемен қаласында мектепке дейінгі білім беру жүйесінде ваучерлік қаржыландыруды енгізу бойынша пилоттық жоба іске қосылады
Жаңа жүйе 83 балабақшаны қамтиды, оның ішінде 31-і мемлекеттік, ал 52-сі жекеменшік ұйымдар, деп хабарлайды Устинка LIVE тілшісі.
Ваучерлік қаржыландыру балаларды балабақшаларға қабылдау тәртібін өзгертіп, мемлекеттік білім беру тапсырысын басқаруды жаңа деңгейге көтереді.
ШҚО Білім басқармасы басшысының орынбасары Жанғазы Әліпбаевтың айтуынша, жаңа жүйеге сәйкес, ата-аналар өз баласын таңдаған мекемеге орналастыру үшін виртуалды ваучерлер алады. Бұл ретте қаржы балаға бекітіледі, яғни егер бала басқа балабақшаға ауысса, қаражат та сол мекемеге бағытталады. Осылайша, “орын іздеу” мәселесі жойылып, орындарды әділ бөлудің жаңа жүйесі енгізіледі. Кезекке бірінші тұрғандар басымдыққа ие болады.
Ваучерлік қаржыландыруды енгізу – қаламыздағы мектепке дейінгі білім беру жүйесін жақсартуға бағытталған маңызды қадам. Бұл модель барлық қатысушылар үшін үдерісті әлдеқайда ыңғайлы әрі түсінікті етеді деп сенеміз, - деді Жанғазы Әліпбаев.
Сонымен қатар, бұл өзгеріс жекеменшік балабақшалар үшін жаңа мүмкіндіктер ашады. Олар жыл ішінде қажетті құжаттарды тапсырғаннан кейін жобаға қосыла алады.
Жобаның операторы ретінде “Қаржы орталығы” АҚ белгіленіп отыр. Ол қатысушылар арасындағы өзара іс-қимылды қамтамасыз етіп, білім беру қызметтеріне ақы төлеуді жүзеге асырады.