Өскемен мен ШҚО Өскемен ЖЭО-ны кеңейтуге 140,3 млрд теңге жұмсалмақ
2028 жылға дейін қуаттылығы 100 МВт №13 турбиналық агрегат пен сағатына 400 тонна бу өндіретін №16 қазандық агрегаты салынбақ
Өскемен ЖЭО кеңейту жобасы бойынша қоғамдық тыңдау өтті, деп хабарлайды Устинка LIVE тілшісі.
Жобаға 2024-2028 жылдары 140,3 млрд теңге инвестиция тарту жоспарлануда. Негізгі серіктес – Еуразиялық даму банкі, мердігер – China Machinery Engineering Group Corporation.
Құрылыс кезінде 500-ге дейін, ал пайдалануға берілгеннен кейін 53 тұрақты жұмыс орны ашылады. Қазіргі уақытта жобалық-сметалық құжаттама әзірленуде. Жобалауға "Project Stroy Company", "КалбаГеоЖоба" ЖШС және "Hubei Machinery and Equipment International Limited" тартылды, - деп хабарлады ШҚО энергетика және тұрғын үй-коммуналдық шаруашылық басқармасы.
ЖЭО басшылығы жобаның өңірдің энергетикалық қажеттіліктерін өтеуге бағытталғанын атап өтті. Бас директор Данияр Нугуманов қоғаммен ашық диалогтың маңыздылығын атап, жоғары экологиялық және сапа стандарттары сақталатынын мәлімдеді.