Өскемен мен ШҚО Өскеменде Президент шыршасы өтті
Жаңажылдық шыршаға облыстың 13 ауданы мен қаласынан 250-ден астам бала қатысты
Жаңа жылдық мерекеге облыстың ата-анасының қамқорлығынсыз қалған балалар, аз қамтылған және көп балалы отбасылардан шыққан балалар мен ерекше білім беру қажеттіліктері бар балалар, сондай-ақ оқуда, спортта, шығармашылықта, қоғамдық өмірде жетістікке жеткен балалар қатысты, деп хабарлайды Устинка LIVE тілшісі.
Балалар ертегілер мен мультфильмдердегі сүйікті кейіпкерлерімен кездесіп, түрлі байқаулар мен ойындарға қатысып, жаңа жылдық қойылым тамашалады. Әр қатысушы тәтті сыйлықтар мен 150 000 теңге ақшалай сертификат алды. Балаларды ШҚО әкімі Ермек Көшербаев құттықтады.
Сиқыр мен ғажайыпқа толы мерекені бүлдіршіндердің асыға күтетіні анық. Өскемендегі Жекпе-жек сарайында ұйымдастырылған салтанатты шарада олар ертегі әлеміне енгендей сезімде болды. Шыршаға оқуда және спортта толағай табысқа жеткен дарынды оқушылар, ерекше қажеттілігі бар және ата-анасының қамқорлығынсыз қалған, қолдауға ие балалар қатысты. Балалардың өздері де мерекеге тыңғылықты дайындалған. Әдемі костюм киген бүлдіршіндер керемет көңіл-күйде болды. Ал олардың жанарындағы қуаныш - біз үшін басты сыйлық, - деді Ермек Көшербаев.
