Ақжардағы тұрғын үйлер орталықтандырылған жылумен қамтылмақ

Тарбағатай ауданы экономикалық әлеуеті жоғары өңірлердің бірі болып табылады. Болашақта бұл жерде бірқатар ірі жобалар іске асырылып, жергілікті халық пен аймақтың дамуына серпін бермек, деп хабарлайды Устинка LIVЕ тілшісі.

Басты жобалардың бірі - Ақжар ауылында орталық жылу қазандығын және жылу жүйелерін салу. Қазіргі уақытта жобалық-сметалық құжаттама әзірленіп жатыр, ал екі негізгі жоба мемлекеттік сараптама кезеңінен өтуде. Жаңа жылу жүйелерінің ұзындығы 8000 метрді құрап, жүйенің қуаты 11,5 Гкал/сағ (13500 кВА) болады деп жоспарлануда. Қазандық іске қосылғаннан кейін 27 әлеуметтік нысан мен 15 көпқабатты тұрғын үй орталықтандырылған жылумен қамтамасыз етіледі. Жобаның жалпы құны қазандық құрылысы үшін 587 млн теңге және жылу желілері үшін 1,2 млрд теңге болады, – деді Тарбағатай ауданының әкімі Дархан Жөргекбаев.

Сонымен қатар, Ақжар ауылында заманауи иппотерапия орталығы ашылады. Бұл орталық атпен емдеу арқылы әлеуметтік және медициналық инфрақұрылымды жаңа деңгейге көтермек. Қазіргі уақытта жоба талқылау кезеңінде тұр және қаржыландыру көздерін анықтауды талап етеді.

Сондай-ақ, Қазақстан Республикасы Президентінің тапсырмасымен Тарбағатай ауданында заманауи әуежай салу жоспарланған. Бұл жоба Зайсан және Тарбағатай аудандарын біріктіріп қана қоймай, Зайсан көліндегі су көлігі порты мен Майқапшағай-Тұғыл теміржол желісіне қолжетімділікті қамтамасыз етеді.

Аудан дамуының тағы бір маңызды бағыты – пайдалы қазбалар кен орындарын барлау жұмыстары. Аудан аумағындағы ең ірі кен орны – "Қызылқайың". 2018-2026 жылдар аралығында мұнда белсенді барлау жұмыстары жүргізілуде. Егер қорлар расталса, 2027-2028 жылдары инфрақұрылым құрылысы басталып, кен комбинатының жобасы іске асырылады. Кәсіпорын толық қуатта жұмыс істеген кезде 1500-ге жуық адам жұмыспен қамтылады.