Өскемен мен ШҚО Кешегі жүк көлігі жарылысынан зардап шеккендер бар
Жарылыс болған уақытта өтіп бара жатқан көліктерге зақым келіп, бірнеше адам жарақат алған
Кеше Өскемен-Самар тас жолында жарылғыш зат тиелген жүк көлігі жарылып, екі адам қаза тапқан болатын, деп еске салады Устинка LIVE тілшісі.
Оқыс оқиға облыс орталығынан 75 шақырым жерде орын алды. ШҚО ПД ақпаратына сүйенсек, VOLVO маркалы жүк көлігі жүріп бара жатқан жерінде жарылған. Самар ауданындағы тау-кен жұмыстарын жүргізу үшін жүк көлігімен алып бара жатқан заттың жарылуы салдарынан көлік жүргізушісі мен жолаушысы қаза тапты.
Сондай-ақ, жарылыс кезінде жақын жерде болған үш жеңіл көлікке зақым келіп, екі адам жарақат алғаны белгілі болды.
Жедел жәрдем көлігі жеткенше өтіп бара жатқан көлікпен зардап шеккендердің бірі облыс орталығындағы ауруханаға жеткізілді. Ал екінші адамға жедел жәрдем мамандары алғашқы көмек көрсетті. Екеуінің де жағдайы ауыр емес, ауруханаға жатқызу қажет болмады, - деп хабарлады ШҚО Денсаулық сақтау басқармасының баспасөз қызметі.