Өскемен мен ШҚО Өскеменде қысқы кезеңдегі ТЖ жою бойынша оқу-жаттығу өтеді
ШҚО құтқарушылары қыс мерзіміндегі төтенше жағдайлардың алдын алу мақсатында оқу-жаттығу өткізеді
22 қарашада Өскемендегі рудалық емес материалдар комбинаты маңында "Қыс-2024" республикалық командалық-штабтық оқу-жаттығу өтеді, деп хабарлайды Устинка LIVE тілшісі.
Оқу-жаттығу барысында қыс мерзіміндегі төтенше жағдай кезінде халыққа көмек көрсету, апаттық құтқару жұмыстарын орындау практика жүзінде көрсетілетін болады. Мысалы, көктайғақ салдарынан туындаған автожолдардағы жол-көлік оқиғалары, су құбыры мен тоқ желілерінде аварияларды қалпына келтіру жұмыстары, қар құрсауында қалған адамдарды қауіпсіз жерге көшіру, қатты соққан боран салдарынан адасып кеткен шопанды іздеу, қайықтағы балықшыны құтқару, мұз ойылып, батып кеткен көлікті және зардап шегушіні шығару мәселелері пысықталатын болады, - дейді ШҚО ТЖД баспасөз қызметі.
Оқу-жаттығу шеңберінде төтенше жағдай кезінде халыққа көмек көрсетілетін техника мен жабдықтар тексеріліп, зардап шеккен халыққа шатырлы лагерь орнатылатын болады.