Өскемен мен ШҚО ШҚО-да мүмкіндігі шектеулі адамдардың көмекшілері негізсіз төлем алған
Шығыс Қазақстанның сыбайлас жемқорлыққа қарсы қызметі облыстың әлеуметтік қорғау саласында сыбайлас жемқорлық тәуекелдеріне сыртқы талдау жүргізіп, бірқатар жүйелі сыбайлас жемқорлық тәуекелдерін анықтады
Бұл туралы ШҚО бойынша Сыбайлас жемқорлыққа қарсы қызметтің басшысы Денис Шакенов мәлімдеді, деп хабарлайды Устинка LIVE тілшісі.
Мысалы, талдау барысында мүгедектердің санаторий-курорттық емделуде болған кезінде олардың 52 жеке көмекшісіне жалпы сомасы 3 миллион теңгеден астам негізсіз төлемдер төленгендігі анықталды.
Алайда, заңнамаға сәйкес мүгедектер курорттық емделуде болған кезінде олардың жеке көмекшілерінің қызметтері тоқтатылуы тиіс.
Талдау қорытындысы бойынша әлеуметтік қызметтер саласының ақпараттық жүйелерін интеграциялау бойынша ұсыныстар берілді.
Сонымен қатар, 3400-ден астам жұмыс беруші кәсіпкерлерге жұмыс орындарын субсидиялаудан заңсыз бас тарту жағдайлары анықталды. Субсидиялаудан бас тарту туралы шешімдерді "Еңбек ұтқырлығы орталығының" басшылары өтінімдерді беру кезектілігін бұза отырып, жеке қалауы бойынша қабылдаған. Сонымен қатар, "Еңбек нарығы" ақпараттық жүйесінде бас тартудың негіздемесі жоқ, бұл белгіленген рәсімдерді тікелей бұзу болып табылады.
Талдау қорытындысы бойынша ұсынымдарды орындау нәтижесінде кезектілікті бұзу бойынша теріс практика тоқтатылды, 261 кәсіпкердің субсидияланатын жұмыс орнын құру туралы 896 өтінімдері кезектілік тәртібімен қайта қаралды және мақұлданды.
Анықталған сыбайлас жемқорлық тәуекелдерін жою және алдағы уақытта мұндай бұзушылықтарға жол бермеу мақсатында арнайы ұсынымдар дайындалып, құзырлы органдарға жолданды, - деп атап өтті Денис Шакенов.