Әлем Солтүстік Кореяда кезекті шетелдік студент тұтқындалды
Ол Пхеньян қаласындағы Ким Ир Сен университетінің студенті 29 жастағы Австралия азаматы Алек Сигли болып шықты
Шетелдік БАҚ-тың ақпаратына сүйенсек, Сигли КХДР-да оқу курсында болған, сонымен бірге туристерге экскурсия ұйымдастырған, деп хабарлайды РОСБАЛТ сайты.
Студенттің не үшін тұтқындалғаны әлі белгісіз, алайда Алектің американдық басылымда өзінің бұл елдегі "еркін" тіршілігі жайлы, сондай-ақ, өзіне ұнаған көрнекі орындар туралы мақала жариялағаны анықталған.
Қазіргі уақытта Австралияның Сыртқы істер министрлігі болған жағдай туралы КХДР-дан түсініктеме талап етуде.
Естеріңізге сала кетейік, 2016 жылы Солтүстік Кореяда көсем бейнеленген үгіт плакатын бұзғаны үшін американдық студент Отто Уормбиер тұтқындаған еді. Сот мұндай әрекеттері үшін оған көп жылдық айып тағайындаған. Тек бір жылдан кейін ғана АҚШ билігі Уормбиердің отанына оралуына қол жеткізді және ол өте ауыр күйде оралды, артынша көп ұзамай қайтыс болды.