Назарбаев ШЫҰ елдерінің қорғаныс министрлерімен кездесті

Кездесуге ҚР, ҚХР, Ресей Федерациясының, Тәжікстан, Өзбекстан, Қырғыз Республикасы, Шанхай ынтымақтастық ұйымының Бас хатшысы қатысты.

ҚР Президентінің сайты хабарлағандай, мемлекет басшысы Шанхай ынтымақтастық ұйымына мүше мемлекеттердің қорғаныс министрлері Астанада ШЫҰ-ға мүше-мемлекеттер басшылары кеңесін және «ЭКСПО-2017» халықаралық көрмесін өткізу қарсаңында басқосып отырғанының маңыздылығын атап өтті.

– Мәдени, аумақтық, тарихи тұрғыдан бір-біріне жақын мемлекеттердің экономикалық ынтымақтастық мәселелерін шешу үшін құрылған Шанхай ынтымақтастық ұйымы өзін елеулі өңірлік бірлестік ретінде көрсете білді, – деді Қазақстан Президенті.

Нұрсұлтан Назарбаев Шанхай хартиясы қабылданған сәттен бергі 15 жыл ішінде бірлескен ауқымды жұмыс атқарылғанына назар аударды. 

– Шанхай ынтымақтастық ұйымына мүше мемлекеттер басшылары кеңесінің  алдағы отырысында ірі екі ел – Үндістан мен Пәкістанды ұйым мүшелігіне қабылдау көзделген. Сол арқылы ШЫҰ жер шары тұрғындарының 40% -ға жуығын біріктіреді. Ең бастысы – барлық мәселелерді консенсус арқылы шешуге негізделген «шанхай рухын» сақтау, – деді Мемлекет басшысы.  

Қазақстан Президенті ұйым қызметінің экономикалық мазмұнын нығайту қажеттігін атап өтті.

– Қазіргі уақытта Шанхай ынтымақтастық ұйымы жұмысының оң қарқыны «Жаңа Жібек жолы» бағдарламасының дамуына байланысты болып отыр. Бұл бағдарламаға ұйым мүшелерінің барлығы, ең алдымен, Қытай Халық Республикасының жақын көршісі - Қазақстан қолдау көрсетуде, – деді Нұрсұлтан Назарбаев.     

Соңында Мемлекет басшысы қорғаныс ведомстволарының қызметі Шанхай ынтымақтастық ұйымының экономикалық интеграциясының бағытымен қатар жүруге тиіс екендігін атап өтті.