Әлем Димаш Құдайбергенов Универсиада ойындарының ашылу салтанатына қатысады
Қытайдағы танымал музыкалық тележобаға қатысып, алғашқы екі турда да ешкімді шаңына ілестірмей атағы аспандаған Димаш Құдайбергенов бүгін XXVIII Дүниежүзілік Қысқы Универсиаданың ашылу салтанатында өнер көрсететін болды
Бұл туралы әншінің PR-менеджері Алпамыс Шәрімов хабарлады.
«Біз Универсиадаға дайынбыз. Сағынышпен Алматыға келдік. Спортшыларымызға сәттілік тілейміз! Көк байрағымыз көкте желбіресін! Димаш бүгін ашылу салтанатында тікелей эфирде өнер көрсететін болады! Жаса қазақ! Алға, Қазақстан!», — деп жазды ол Instagram-парақшасында.
«Қытайда абыройымызды асқақтатқан Димаш Құдайбергенов бүгін XXVIII Дүниежүзілік Қысқы Универсиаданың ашылу салтанатында өнер көрсетеді. Тікелей эфир «Қазақстан» және Kazsport телеарналарында. Басталуы 18:55-те» деп жазады телеарна.
Универсиада 2017 салтанатты ашылу шарасы бүгін 19:00-де «Алматы Арена» мұз сарайында өтеді.
