Глубокое ауданының тұрғындары ТЖ режімін жариялауды сұрауда

Предгорное ауылындағы арық суы жақын маңдағы үйлердің бай-бақшасына дейін жетіп отыр. Жергілікті билік су арнасын бұрғанымен, су енді басқа жақты басып жатқан көрінеді.

Шағын ғана арық енді Рабочая көшесіндегі үйлердің бақшасын шайып кеткен. Су жарты метрлік деңгейге дейін көтеріліп, бірнеше құдықты су басты. Осылайша ауыл тұрғындары ауыз сусыз қалды. Олар енді үйімізді де су баса ма деп қорқады.

- Бізге көмекке ауыр техника қажет. Бірақ бізді естір құлақ жоқ, - дейді "Устинки плюс"  газетіне хабарласқан ауыл тұрғындарының бірі. - Біз 112 желісіне хабарласып, бізге, ең құрығанда, трактор жіберулерін өтіндік. Бірақ еш нәтижесіз. Төрт үйдің бақшасын су басты. Енді су үйімізге дейін жетіп қала ма деп қорқудамыз.

Ал жергілікті әкімдіктегілер қорқуға еш негіз жоқтығын айтады. 

- Жағдай біздің бақылауымызда, - дейді Глубокое ауданы әкімінің орынбасары Сергей Кимасов. - Иә, бірнеше бақшаны су басты. Бірақ үйлерге жетпеді. Оған ауыр техниканың қажеті бар деп ойламаймын. Өз күшіміз жетеді.